Wien HHStA, MEA RTA 8/Konv. 1, fol. 184r (Ausf. mit Siegel)1.

Nachdem wir yetzo aus treffenlichen ursachen fur notwendig geacht, ain ansehenliche, vertraute person von unserm hof in das Hl. Reich deutscher nation abzufertigen und zu solchem den edlen, unsern und des Reichs lieben getreuen Niclausen Perrenotten, H. zu Granvellen, unsern obersten gehaimen rath und orator general in teutschen und welschen landen, furgenomen und verordnet und ime undter anderm bevolhen, das er an euer L. und euch samptlich und sonderlich, wie es ine fur fueglich und guet ansehen wirdet, von unserntwegen etlich werbungen und euern L. und euch unser maynung antzaigen solle, wie euere L. und ir von ime vernemen werden. Und begern demnach an eure L. und euch all und ainen yeden in sonders, dem dise unsere offene credentzschrift furgetragen wirdet, mit freundtlichem, gnedigem fleiß, euere L. und ir wellet gedachtem unserm obersten rath und bottschaft oder im fal, so er zu euern L. und euch euer ainem oder mer yemandts andern an seiner stat mit diser credentz und seinem schriftlichen oder mundtlichen bericht verordnen wirdet, in solher seiner werbung und handlung gleich uns selbs glauben geben und euch hierauf guetwillig, gehorsam und dermassen ertzaigen, als wir uns des gentzlich ungezweifelt versehen. Das kompt uns von euern L. und euch samptlich und sonderlich zu sonderm gueten gefallen. Geschicht daran unser will und maynung. [...].

[US:] Carolus, J[ohann] Obernburger.