Berlin GStAPK, XX. HA, StA Königsberg, HBA A 4 (= Kasten 209), (Ausf.); DV: Melchior von Osse, kfl. cantzler, zeigt an, das er bey den reichsstenden neben andern vorfürdern hat helfen, damit die vermeinte acht, so man sich wider fstl. Dt. zu Preussen understanden, uff ein jar suspendirt worden. Datum Nurmberg, Dornstag nach Cantate anno etc. 43.

Als euer fstl. Gn. durch ire dinere alhir bei der röm. kgl. Mt., auch den stenden des Hl. Reichs umb suspension der varmeinten acht, der mann sich widder euer fstl. Gn. understanden, angesucht und von deme durchlauchtigisten Kf. tzu Sachsen, meinem gnedigsten herrn etc., ich sonderlichen bevelch gehabt, solchen handel tzu euer fstl. Gn. besten tzu fordern helfen, welchem nach ich nicht underlassen, bei den gesanthen der Kff. Coln, Trier und Pfaltz1, die mit einbildung der itzigen sorglichen leufte und viler andern umbstende tzu bewilligung gesuchter suspension tzu vermogen, antzuhalden. Die sich auch hirauf dorinne fordersam ertzeigt und also im churfurstenradt und dann – in ansehung, das auch im furstenradt durch das meher – erhalden, das bemelte acht auf ein jhar langk suspendirt, ungeachtet was der gesanthe des deutzschen ordens darkegen vorgewanth. Mitlerweile kann man mit hülfe des almechtigen Gottes hirinne weither bequeme mas finden. Es haben sich auch euer fstl. Gn. gesanthe in disen euer fstl. Gn. sachen gantz fleissig ertzaigt.