Frankfurt ISG, RTA 54, fol. 137rv (Kop.)1; ÜS fol. 137r: Antwurt der gesanten der stende der augspurgischen confession und religion uf den letzsten irer kgl. Mt. furhalt.

Sie hetten irer kgl. Mt. jetzigen furhalt [Nr. 184] in underthenigkhait gehort und sonderlich, durch was mittel ir Mt. erachtet, das dise stende irer beschwerung erledigt sein sollten. Und khonnen nit gedenckhen, das solchen iren beschwerungen aus vor oft dargethonen ursachen durch jetzigen irer Mt. furschlag abgeholfen. Derhalben und nachdem sie sich noch in vorigem mangel und beschwerden befienden und dartzu auch von iren herrn und obern weithern bevelch nit hetten, so khonnen sie solche irer Mt. furschleg und handlung nit verwilligen. Und soll es ir kgl. Mt. darfur nit achten, das es an der gesandten willen fhele, sonder das sie dartzu auß vorgemelten ursachen dartzu nit komen mögen, mit undertheniger bitt, ire personen als dienner und die uber iren bevelch nit zu geen wisten, nicht zu verdencken.

Seyn aber des underthenigen erpietens von allem dem, das sich alhie uf dysem reichstag zugetragen, dergleichen dieses jetzigen irer Mt. genedigen ersuchens, getreulichen, guten bericht und antzeig zu geben. Und wollten sich damit irer kgl. Mt. undertheniglich befholen haben.

Der kgl. Mt. schluss:

Dieweyl ir Mt. abermaln vernomen, das dise stende bey voriger meynung beruheten, so musten es ir kgl. Mt. mit gedult annemen und di sachen diser zeit bei dem jetzigen ersuchen beruhen lassen. Und wollten sich ir Mt. zu disen stenden genediglichen versehen, sie wurden sich auf solche ir Mt. begehr als christliche heupter wilfharig erzeigen und ir kgl. Mt. sonderlich in dieser noth mit gepurender hilf nit verlassen.

Ir Mt. wollten sich auch versehen, die räthe und gesandten wurden sollichs mit dem besten an ir genedigst, genedig herrn und obern gelangen lassen, inhalt ihres erpietens etc.

Daß wurden etc.a