Entschlossenheit, nur noch zehn Tage auf das Eintreffen weiterer Reichstagsteilnehmer zu warten.

[Köln, 9. Juli 1512]1

Frankfurt, IfStG, RTA Bd. 29, fol. 31a u. b, Kop.

Kff., Ff. und potschaften, sovil ytzo alhye seyn, haben ksl. Mt. rete anbringen des lengern alhye wartens gehort und verstanden, zwyfeln nit, ksl. Mt. und die rete haben des langen legers, byshere alhye vorgebenlich gescheen, gute wissens und wie beschwerlich das hievor zum meren male geandet. Sey inen darumb lenger verzog, als zo achten, noch beschwerlicher. Hetten sich versehen, die andern stende solten dem anzeigen und vertrosten nach, jüngst von ksl. Mt. wegen bescheen, alhere sich gefugt haben, das aber unz [= bisher] noch nit gescheen. Darumb ksl. Mt. und ire rete wol zu achten hetten, wo die stende nit in merer, dapferer anzale wann bishere ankomen, das in sachen, ksl. Mt. und das hl. Reich belangent, nichts verfenklichs oder austreglichs gehantelt oder beschlossen werden moicht. Woulten aber dannnocht ksl. Mt. zu undertenigem gefallen und gehorsam noch zehen tag schirstkoment alhye verharren, in zuversicht, die andern stende soulten sich mitler zit auch furdern und alher komen, damit statlich und entlich gehandelt werden moicht. Wo aber die stende mitler zit nit dapferer alher komen würden, so sy Kff., Ff. und der potschaften zuversicht, ksl. Mt. werde alsdan in irem abscheyden kein myßfallen haben, sonder sye irer notturft gnediglich bedenken. Das erbieten sye sich neben iren pflichten unterteniglich zu verdienen.