Aufforderung zur Bewilligung der von Kg. Maximilian erbetenen Anleihe für den Romzug.

Konstanz, 4. Juni 1507 (freytag nach corporis Cristi).1

Wien, HHStA, MEA RTA 3a, fol. 449–449’ (Kop., Überschr.: Ausschreiben Kff., Ff. und stend des Reichs an etlich kaufleut, kgl. Mt. anlehen belangend.) = Textvorlage A.

/449/ Kff., Ff. und stende des Hl. Reichs, ytz auf dem tag zu Costenz versamelt.

Lb. besondern, die röm. kgl. Mt. etc., unser allergnst. H., wirdet yetz zu irer Mt. furgenomen romzug, auch andern des Hl. Reichs treffenlichen obligenden gescheften, darin ir kgl. Mt. und das Hl. Reich merklich angefochten und zu ertrennen understanden werden, ein anlehen an euch begern und euch umb solich gelt, das von weyhenachten uber ein jar nehstkunftig [25.12.1508] widerumb zu bezalen, gnugsamlich versichern. Und dieweil wir nu ermessen, das irer kgl. Mt. und dem Hl. Reich merklichs daran gelegen ist und in vil hundert jaren der teutschen nacion nye so not getan hat, weliche notdurft und obligen derselben teutschen nacion und des Hl. Reichs wir als glider desselben nach unserm vermogen mitsambt irer kgl. Mt. zum besten zu wenden und abzulegen geneigt, pflichtig und begirig sein, begeren wir an euch mit fleis und ernst, ir wollet euch uf berurt irer kgl. Mt. ansuchen gutwillig halten und erzeigen und das nit abslagen, angesehen die merklich notdurft, wie obstet, darzu auch ir pillich euer hilf tun sollet, und sonderlich dieweil ir umb solichs von kgl. Mt. gnugsamlich versichert und one zweifel gnediglich und gewißlich bezalt werdet. Daran beweißt ir irer kgl. Mt. und uns sonder hoch gefallen, das allzeit gnediglich gegen euch erkennt wirdet. [Datum].

/449’/ Unsern lb., besondern N. den kaufleuten aller geselschaften, so zu Augspurg wonen und hantirung haben.

In simili Nurmberg, Lubegk, Coln, Leip[zi]gk, Frankfort, Memmingen, Ravenspurg.

a–Und noch hieruber drey brief mit solichen uberschriften, darin ein spacium zu der statt gelassen werd–.